Lanbide heziketan izan den matrikula kopuruaren igoera oso nabarmena izan da
Eustatek ezagutzera eman dituen datuen arabera, pasa den ikasturtean, Euskal Autonomia Erkidegoan unibertsitateaz kanpoko ikasketetan izena eman zuten ikasleen kopurua 413.464koa izan zen. Aurreko ikasturtean izan zen kopuruarekin alderatuta % 0,3ko igoera eman dela azpimarratu behar da. Ildo honetan, lanbide heziketan izan den matrikula kopuruaren igoera oso nabarmena izan da, bai gradu ertainetan (% 5,7 gehiago) bai goi mailako graduetan (% 4,9 gehiago). Dena den, oraindik ere, batxilergoan izena eman duten ikasleen kopurua ( + % 0,6) lanbide heziketako gradu ertainetan izena eman dutenen kopuruaren bikoitza izaten jarraitzen du.
Araubide orokorreko irakaskuntzan den ikasleriaren banaketari dagokionez, 2013-14 ikasturtean, sare publiko eta pribatua % 50 inguruan orekatu dira. Lanbide heziketako gradu ertainetan eta Helduen Hezkuntzan, ostera, ikasleriaren % 62a eta % 98a sare publikoan matrikulatu da, hurrenez hurren.
Daturik kezkagarriena Haur Hezkuntzan (3-6 urte bitarteko ikasleak) eman da, non, 18 urtez jarraian hazkundeak izan ostean, matrikulen kopurua % 1,3an jaitsi da (1.230 ikasle gutxiago). Adituen ustetan, krisi ekonomikoa dela eta eman den jaiotza-tasaren jaitsiera ikasgeletan nabaritzen hasia da.
Helduen Prestakuntza Orokorrean (- % 19), Hasierako Lan Gaitasun Programetan (- % 9) eta Musika ikasketetan (- %1,4) ere ikasle kopurua jaitsi da.
Ikasleria euskalduna
Eustatek ezagutzera eman dituen datuen arabera, araubide orokorreko euskal ikasleria, ia bere osotasunean (% 86), euskalduna dela baiezta daiteke. Derrigorrezko ikasketen kasuan, portzentaje hau % 90era igotzen da. Datu hauek, azken hamarkadan euskarazko irakaskuntzaren alde izan den joera sendotzen laguntzen dute.
