Pasa den ikasturtean 595 prestakuntza-saio garatu ziren hainbat ikastetxetan
Eusko Jaurlaritzako Segurtasun Sailak ezagutzera eman duenez, pasa den ikasturtean 31.000 pertsona inguru izan ziren ‘Prebentzioa Komunikazioaren bitartez landuz’ egitasmoan parte hartu zutenak. Programa horren xede nagusia da genero-indarkeria, drogak, Interneteko arriskuak edo eskola-jazarpena bezalako gaien inguruko prestakuntza eskaintzea eta 150 ertzain boluntarioek irakasten dute. Egitasmoa ekintza- erantzunkidetasunean oinarritzen da, eta, hainbat kolektiborekin egindako prestakuntza-topaketen bitartez, pertsona bat delitu jakin batzuen biktima edo egile bihurtzeko aukera murriztea du helburu.
Pasa den ikasturtean 595 prestakuntza-saio garatu ziren hainbat ikastetxetan eta horietan 26.675 ikaslek hartu zuten parte. Gainera, beste gizarte-kolektibo batzuei (adinekoen elkarteak, emakumeenak, kultur elkarteak, profesionalak eta abar) zuzendutako beste 81 prestakuntza-topaketetan 2.746 parte-hartzaile izan ziren. Horri guztiari gehitu behar zaizkio herritarren hainbat kolektibok hainbat ertzain-etxetara egin zituzten bisitak. Guztira, 30.949 parte-hartzaile izan dituzten 737 jarduera egin dira.
Interneteko arriskuei buruzko prestakuntza izan da, 13.737 parte-hartzailerekin, eskola-segmentuak gehien eskatu duen gaia; bullying edo eskola-jazarpena izan da hurrengoa, 5.330 parte-hartzailerekin, eta gizalegearen kontrako portaerek 2.697 lagun bildu dituzte. Drogen gaiak 2.312 adingabe bildu ditu eta genero-indarkeriari edo etxeko indarkeriari buruzko saioetan 1.744 ikaslek parte hartu dute. Programan jorratu diren beste gai batzuk hauek dira: larrialdiak eta 112 telefonoa Haur Hezkuntzan (392); prebentzioa kirol-jardueretan (330); bide-segurtasuna (93); Giza Eskubideak (30); eta gazte-talde berri antolatuak eta indarkeriazkoak (10).
