Tuenti eta Facebook giza sare erabilienak dira gazteen artean eta era berean, denbora gehien kentzen diotenak. Danba izeneko enpresak nerabeen ordenagailu ohiturak aztertzen ditu gurasoek horrela eskatuz gero. Bere seme-alabak ordenagailuan aritzen direnean zein guneetaran sartzen diren jakin nahi duten gurasoek enpresa honetara jo dezakete eta Danbak gazteak zein web-ak erabiltzen dituzten ikertzen du.
Guztira estatu espainiarreko 2.000 ordenagailu monitorizatu ditu Danbak 2009. eta 2010. urteetan zehar eta horien datuen arabera, 8 eta 16 urte bitarteko nerabeek, batez beste, egunean ordu bete eta sei minutu eman zuten sarean 2009an eta ordu bete eta 55 minutu 2010ean.
Gehien erabiltzen diren zerbitzuak
Halaber, datuek diote 2010. urtean gazteak ordu eta erdi sare sozialetan murgildurik daude, hain zuzen bere aisia denboraren % 70. Testuinguru horretan, gehien erabiltzen duten sare soziala Tuenti da. Facebook-ek jarraitzen dio eta gehien erabiltzen dituzten beste web guneak Google, You Tube eta Yahoo eta Gmail posta elektronikoko zerbitzuak dira.
Minijokoak gunea ere erabilgarrienetakoa da eta, era berean, Marca egunkari digitala eta Cartoon Network eta Megavideo marrazki bizidunetako kateak. Horrela, gazteek interneten daudenean, denboraren % 70 sare sozialetan ematen dute, % 9 bilatzaileetan eta % 13 bideoak ikusten.
Azpimarragarria da gazte hauek ez dituztela bere ikasketen osagarri gisa internet erabiltzen. Izan ere, wikipedia eta hezkuntza guneak ez daude erabilgarri gaztetxoen buruetan. Datu horiek harremana dute Europako Batzordeak aurkeztutako txosten batekin . Azterketa horretako ondorio larri bat da gazteek jende ezezaguna ezagutzen dutela sarearen bidez eta ostean nerabeen % 8k topaketa bat izaten dutela pertsona horrekin.
Erantzunkizunezkoak
Hala eta guztiz ere, Danba enpresakoek nerabeak erantzukizun nahikoarekin aritzen direla interneten argi dute. Enpresako arduradunek, gazteek gune susmagarrietan sartzen direnean gurasoei mezuak bidaltzen dizkiete edo ohartarazten diete haien seme-alaben jokaerez. Enpresako arduradun hauek baieztatzen dute mezu gutxi bidaltzen dituztela eta bidaltzen dituztenean, seme-alaba hori gehiegi tuentin edo facebook-en sartzen direla jakinarazteko izaten dela batik-bat. Bortxakeria, sektak, anorexia eta bulimia dira enpresa honetara jo duten gurasoek agertzen dituzten beldurrak, eta batez ere, alabak dituzten gurasoek anorexia eta bulimiarengatik eskatzen dituzte Danbaren zerbitzuak.
