Macsonrisas elkarteak teknologia kontrolik gabe erabiltzearen arriskuez ohartarazi du argitaratu berri duen txosten batean. Pasa den ikasturtean Macsonrisas-ek 1.500 hezkuntza-saio baino gehiago eman ditu ikastetxe, enpresa eta udaletan, ikasleei, familiei eta irakasleei zuzenduta.
Horietan ikusi ahal izan dutenez, Lehen Hezkuntzako 3. mailatik aurrera haur asko gailu digitalak erabiltzen hasten dira behar bezalako ikuskapenik gabe. Guraso gehienek gailu horien erabilera denbora kontrolatzen saiatzen diren arren, kasu gehienetan, teknologiaren gehiegizko erabilera bat ematen dela ikusi da eta, zenbait kasutan, mendekotasun kasuak ere garatu izan dira.
Macsonrisasek azpimarratzen du familia askok beren seme-alaben pantaila-denbora murrizteko irtenbide magiko bat bilatzen dutela, baina askotan ez direla jabetzen beren erabilera sustatzen jarraitzen dutela. Adin goiztiarretik mugak eta arauak ezartzearen garrantzia nabarmentzen da.
Gero eta arazo gehiago
Gehiegizko erabilera horrez gain, hainbat kasutan, haurrek egokiak ez diren edukiak ikusten dituztela aurkitu dute. Horrek zuzeneko eragina du haurren artean gero eta ohikoagoak diren irainen eta errespetu falten hazkundean eta normalizazioan.
Macsonrisas-ek azaldu duenez, adingabeek ez dute teknologiaren erabilera kontzientea egiten, horretarako behar den heldutasuna ez dutelako. Derrigorrezko Bigarren Hezkuntzaren kasuan, elkarteak pantailen abusua eta mendekotasun kasuak identifikatu ditu. Nerabeek ez dute gehiegizko erabilera hori abusutzat hartzen, besteak beste, gurasoek ere teknologiaren gehiegizko erabilera egiten dutelako. Hezkuntza maila horretan diren ikasleen artean ere jokabide adeigabeak biderkatu dira eta, zenbait kasutan ‘ikasgela zailak’ sortu dira.
Txostenak jasotzen duenez, adingabe askok ez dakite sarean egin ohi dituzten zenbait jardunbide delitutzat har daitezkeela. Horrek azalduko luke, adibidez, nerabeen arteko sextorsion kasuen gorakada edo online apustuen gorakada. Ildo berean, nerabeak ez dira konturatzen sare sozialen gehiegizko erabilerak kalte egiten diela, bereziki, nesken kasuan, autoestimuan eta osasun mentalean. Hori guztia gutxi balitz, txostenak jasotzen duenez, irakasleek ez dute ezagutzen adingabeen mundu digitala eta haren dinamikak.
