Donostiako Udalak eta AGIFES-Osasun Mentaleko Arazoak dituzten Pertsonen eta Senideen Gipuzkoako Elkarteak gazteen eta nerabeen artean osasun mentaleko arazoak prebenitzea helburu duen ‘Zeuk Aukeratu’ programa jarri dute abian.
Donostiako Udaleko Ekologia eta Osasun Publikoko zinegotzi Marisol Garmendiak programa honen garrantzia azpimarratu du, osasun mentaleko arazoen erdia baino gehiago 15 urte bete aurretik azaltzen direla azalduz. Kopuru hori % 75era arte igotzen da 18 urte bete aurretik. Gainera, gazteen % 49k uneren batean bere buruaz beste egitea pentsatu du. Horregatik funtsezkoa da modu goiztiarrean eta eraginkorrean esku hartzea.
‘Zeuk Aukeratu’ programaren helburu nagusia da osasun mentalaren garrantziaz sentsibilizatzea, izan daitezkeen arazoen zeinu goiztiarrak identifikatzea eta nahasmendu horiei lotutako estigma murriztea. Programaren ikuspegiak arazoa estereotipoetatik libre ulertzea bilatzen du, egoera indibidualen konplexutasuna aitortuz.
Ikastetxeetan
Programa eskola-esparrura zuzenduta dago, eta hezkuntza-sistemako eragile guztiak inplikatzea du helburu, familiak, irakasleak eta 12 eta 22 urte bitarteko ikasleak barne. Gazteen ongizatean eta errendimenduan eragin negatiboa izan ohi duten ohiko arazoei heltzen zaie, hala nola antsietatea, aldarte baxua, familia- eta ikasketa-gatazkak, bai eta suizidio-ideiak edo -saiakerak.
‘Zeuk Aukeratu’ programaren ikuspegia babes-faktoreak indartzean eta ondoez emozionalaren arrisku-faktoreak txikiagotzean datza, horiek estres kronikoa eta gaixotasun mentalak eragin baititzakete. Nahasmendu horiek bizitzako hainbat alderdiri eragiten diete, prozesu afektiboak, kognitiboak eta pertsonen portaera barne.
