Eusko Jaurlaritza lehen hezkuntzako ikasleen euskarazko ahozko adierazpena hobetzea helburu duen Berba-lapiko izeneko programa sustatzen ari da. Proiektua, nagusiki, erdara nagusi duten Euskal Autonomia Erkidegoko testuinguru soziolinguistikoetan ezartzen ari da. Azken lau urteetan, programa aholkularitza eta prestakuntza jasotzen duten 50 ikastetxetara zabaldu da.
Metodologia eguneroko hizkuntza-errutinak eraikitzean datza, non ikasleek ahoz parte hartzen duten ikasgelako egoera errealetan irakasleen laguntzarekin eta esku-hartzearekin.
20 minutuko saioak
Gaur egun, programa 50 ikastetxe publikotan garatzen da lehen hezkuntzako 331 irakasleen konplizitateari esker. 5.236 ikasle inguru Berba-lapiko programaz baliatzen dira.
Praktika honek onarpen ona du ikasleen aldetik, euskaraz komunikatzeaz gozatzen dutelako eta pixkanaka beren komunikazio-gaitasuna hobetzen doazelako.
Berba-lapikorekin 20 minutuko saio bat egiten da egunero, ikasgelaren barruko leku eta ingurune atsegin batean. Espazio honetan ahozko komunikazioa lantzen da testu-genero ezberdinak erabiliz. Kultura eta literatura herrikoian oinarritutako testuak erabiltzen dira, ikasleen testuinguru eta erreferentzietara egokituta. Horrela, literatura herrikoiak ere garrantzia hartzen du eta ikasleen artean testu tradizionalak ezagutarazten dira.
Hezkuntza Sailak sustatutako proiektuaren garapen-taldea Mondragon Unibertsitateak eta Soziolinguistika Klusterrak osatzen dute, eta Eusko Jaurlaritzaren orientazio pedagogikorako zentroak diren Berritzegunekin koordinatuta lan egiten dute.
