Merkataritza arautzeko ordenantzen liburu historikoa, balio historiko handia duena eta Bilboko itsas-museoaren bilduma iraunkorrean ikusgai dagoena, nazioarteko banda batek lapurtu du. Horixe da aurtengo “Forensic Science” proiektuaren abiapuntua. Proiektu horretan, 10 ikastetxetatik etorritako 10 ikaslek probak bildu behar izan dituzte kasu korapilatsu hori konpontzeko.
Horretarako, Ertzaintzaren Polizia Zientifikoaren Burutzak delitu hori sortu du Bigarren Hezkuntzako eta Batxilergoko ikasleei zuzendutako “Forensic Science” Hezkuntzako STEAM (Science, Technology, Engineering, Arts and Mathematics) “Forensic Science” proiektuaren barruan.
Auzitegi-zientziak interesa pizten du gazteengan. Azken urteotan, ikerketa kriminalarekin lotutako eleberri, film eta telesail ugari sortu dira, eta ospea lortu dute. Proiektu honen bidez, ikasleek STEM lanbide bat ezagutzen dute: polizia zientifikoa.
Ertzaintzaren Polizia Zientifikoak Gaztelueta ikastetxearekin elkarlanean bultzatutako proiektu berritzaile honen helburua da gazteek konpetentzia teknikoak eta zeharkakoak garatzea, baita diziplina zientifiko eta teknologikoetan bokazioak sustatzea ere.
Aurten, 26 euskal ikastetxek hartuko dute parte proiektuan. Ekimenak talde-lana, berrikuntza, ikerketa-trebetasunak eta pentsamendu sortzaile eta kritikoa bezalako gaitasunak garatzeko aukera ematen die ikasleei, ikasturtean zehar hainbat jardueraren bidez.
Krimenaren egoeratik frogen azterketara
“Forensic Science” proiektuaren lehenengo fasean, ikasleek begi-ikuskapena egin dute gertakarien lekuan bertan, kasua argitzen lagunduko duten ebidentziak aurkitzen saiatzeko.
Ertzaintzaren Polizia Zientifikoaren Burutzako kideen laguntzarekin, ikasleek eszenaren krokis bat egin dute; eszena osoari eta zatiei argazkiak atera dizkiete; ebidentziak finkatu, deskribatu, bildu eta enbalatu dituzte, horien artean, hatz-markak; eta bildutako ebidentzia guztien erregistro dokumentala egin dute. Horretarako, Ertzaintzaren polizia zientifikoak erabiltzen dituen benetako baliabide eta materialak izan dituzte.
Jarduera horren helburua da delitu-egitatea berreraikitzea, aurkitutako froga-elementuak (edo ebidentziak) aztertuz, Agintaritza Judizialaren eskuetan jarri ahal izateko.
Bilboko Itsasmuseumen egindako landa-lanaren ondoren, Forensic Science proiektuan parte hartzen duten ikasleek euren zentroetan jarraitu beharko dute orain ikerketarekin, ebidentzia guztiak aztertuz eta dituzten susmoak arrazoituz; ikerketa hori ez da amaitzen parte hartzen duten ikastetxe bakoitzean ere ahozko epaiketa bat egin arte.
Forensic Science proiektuak modu arrakastatsuan integratzen ditu zientzia eta teknologia arteekin eta humanitateekin, artearekin, inguratzen duen testuinguru historikoarekin eta zuzenbidearekin lotutako alderdiak barneratzen baititu. Ikasleek praktikan jartzen dituzte beren ikastetxeetan diziplina zientifiko eta tekniko desberdinetan eskuratzen ari diren ezagutzak, krimenaren eszenan jasotako ebidentziak aztertzeko, metodo zientifikoari jarraiki ikerketa bat egiteko eta poliziaren aurrean defendatuko dituzten ondorioetara iristeko.
