Pasa den otsailaren 13an, 2.000 ikasle baino gehiagok 410 enpresa-proiektu aurkeztu zituzten Eibarren egin zen Ikasenpresa azokaren XV. edizioan. Azoka Eusko Jaurlaritzaren Hezkuntza Sailaren menpe dagoen Lanbide Heziketako Talentuaren Euskal Institutuak (iTlent) antolatu zuen Eibarko Udalarekin lankidetzan.
Untzaga plazan jarritako bi karpa handi eta Txaltxa Zelaiko hirugarren bat izan ziren Lanbide Heziketako 50 ikastetxetako ikasleek garatutako ekimenen erakustoki, 100 irakasle baino gehiagoren babesarekin. Proiektuak –enpresa-simulazioak izan arren– produktu eta zerbitzu errealak eskaini zituzten, jasangarritasun eta berdintasun irizpideen arabera diseinatuak eta pertsonen bizi-kalitatea hobetzera bideratuak.
Edizio honetako proposamen berritzaileenen artean nabarmentzen dira autorregulazio termikoko sistema duen zurezko etxe bat, igeltsuz eta metal-azkoinaz egindako bitxiak, euri-olana automatizatuta duen esekitoki elektrikoa, eta egokitutako konponbideak, hala nola joko robotikoak mugikortasun murriztua duten pertsonentzat, edo esklerosi anizkoitza eta hizketa-arazoak dituzten haurrentzako aisialdi-zentro espezializatu bat.
Ikasenpresa programa ekimenak ikasleei euren gaitasun ekintzaileak garatzeko aukera ematen die, dagozkien lanbide-familiekin lotutako enpresa-proiektuak sortuz eta kudeatuz, irakasle-taldearen laguntzarekin eta lankidetzarekin.
