La Caixa Fundazioak, Bizkaiko Foru Aldundiak eta Bilboko Udalak bat egin dute hiriburuko Azkuna Zentroan sormenezko teknologietarako TUMO zentro berria sortzeko. Proiektu aitzindari honek 10 milioi euroko inbertsioa jasoko du datozen lau urteetan, eta 2026rako zabaltzea aurreikusten da.
Doako sarbidea izango duen programa honek 12 eta 18 urte bitarteko nerabeei zuzenduta dago, eta zortzi ikaskuntza-arlo eskainiko ditu hasieran:
- robotika
- argazkigintza
- bideojokoen garapena
- diseinu grafikoa
- zinema
- programazioa
- musika
- animazioa
2027tik aurrera, 3D modelatua eta adimen artifizial sortzailea gehituko dira eskaintzara.
“Hilabete gutxi barru, Bilbo TUMO zentroen sarean sartuko da,” azaldu du La Caixa Fundazioko Kultura eta Lurraldeko zuzendariorde nagusi Rafael Chuecak . TUMO zentroek ikaskuntza eredu berritzailea dute oinarri, ikasleei aukera emanez gehien interesatzen zaizkien arloetan sakontzeko coach eta profesionalen laguntzarekin.
Bilboko alkate Juan Mari Aburtok proiektuaren garrantzia nabarmendu du: “STEAM prestakuntza-aukera bat da, bertoko talentuaren garapenaren zerbitzura egongo dena.” Era berean, azpimarratu du Bilboko 12 eta 18 urte bitarteko gazte guztiek aukera izango dutela programa honetan parte hartzeko “berdintasunean eta doan.”
Ikaskuntza eredu berritzailea
TUMO eredua ikaskuntza-planen hiperpertsonalizazioan oinarritzen da. Bertan izena ematen duten gazte bakoitzak eskaintzen diren arlo guztiak probatzen ditu lehen hilabetean eta, ondoren, gehien interesatzen zaizkion hiru aukeratzen ditu. Ikasketa prozesuak bi urte edo gehiago iraun dezake eta autoikaskuntzako jarduerak, tailerrak eta laborategiak uztartzen ditu.
TUMO Path softwareak ikasle bakoitzaren ikaskuntza-plana moldatzen du, bere interesak eta erritmoa errespetatuz. Programaren ezaugarri bereizgarrienetakoa da teknologia eta sormen sektoreko profesionalek gidatutako tailer eta laborategiak eskaintzen dituela, ikasleei aukera emanez benetako proiektuetan parte hartzeko.
“Oso pozik gaude TUMO Bilbao-Bizkaia zentroa irekitzeagatik eta 2026-2027 ikasturtetik aurrera urtean 1.000 ikasle baino gehiago hartu ahal izateagatik,” adierazi du La Caixa Fundazioko Hezkuntza Saileko zuzendari María Espinetek .
Nazioarteko arrakasta
Marie Lou Papazian, TUMO-ren sortzaile eta zuzendari nagusiak, bere poztasuna adierazi du Estatuan lehen TUMO zentroa irekitzeagatik: “Oso harro gaude Espainian gure lehen TUMO zentroa irekitzeaz, gure balioekin bat datozen bazkideekin.”
Armenian sortutako programa honek dagoeneko 25.000 ikasle baino gehiago ditu mundu osoko zortzi herrialdetan, eta zentro berriak irekitzen ari dira etengabe. Armenian egindako eragin-azterketak frogatu du programan parte hartzen duten gazteek errendimendu akademikoa, lan-aukerak eta gizartean duten inplikazioa hobetzen dituztela.
Proiektu honek Bilbo eta Bizkaia kokatzen ditu talentua garatzeko eta hezkuntza berritzailearen erreferente gisa nazioartean. Bizkaiko Ahaldun Nagusi Elixabete Etxanobek adierazi duen moduan, “TUMO Bilbao-Bizkaia proiektuarekin gure gazteen eskura aukera paregabea jartzen ari gara, gazte horien talentua, sormena eta espiritu kritikoa garatzeko.”
