Gasteizek gazteentzako gune berria izango du San Martin zentroan, Gazte Gaming zegoen leku berean. Gune berria 12 eta 18 urte bitarteko gazteei zuzenduko zaie eta asteburuetan hainbat jarduera eskainiko dizkie.
Gunea urtarrilaren 24tik aurrera asteburuetan egongo da zabalik. Ostiraletan 18:00etatik 21:00etara, larunbatetan 18:00etatik 22:00etara, eta igandeetan 17:00etatik 20:00etara. Igandeetan, 18:30etik 20:00etarako tartea 16-18 urte bitarteko gazteentzat gordeta egongo da.
Zentroaren barruan, gazteek bideojoko eta ordenagailuentzako guneak, tailerrak, mahai-futbola, diana eta atseden hartzeko gune bat aurkituko dituzte. Gorputz adierazpenerako gelak ere izango dira, hala nola dantzarako.
Sarrera librea eta doakoa izango da, nahiz eta tutore baten baimen sinatua beharko den lehenengo aldiz sartzeko. Irekita dagoen ordu guztietan, bi begirale egongo dira jarduerak dinamizatzeko eta laguntza eskaintzeko.
Inaugurazioa
Gazte gunearen inaugurazioa urtarrilaren 18an izango da, 17:30etik 19:30era. Egun horretan jardueren erakustaldi bat eta merienda bat antolatuko dira. Gainera, bi lehiaketa abiatuko dira gazteek gunearen izena eta irudia aukeratu ditzaten. Sariak 75 eta 225 eurokoak izango dira, hurrenez hurren, Gasteizko dendetan trukatzeko.
Lehiaketa hauek hirian bizi, ikasi edo lan egiten duten 12-18 urte bitarteko gazteentzat irekita daude. Behin izena aukeratuta, irudia erabakitzeko lehiaketa hasiko da, guneak erabiltzaileen ideia eta proposamenak isla ditzan.
Proiektuaren jatorria
Proiektua Hiretu Hiria 2022-2023 gazte parte-hartze programatik sortu zen, non ikasle talde batzuek hirian gazte gune bat sortzeko proposamenak aurkeztu zituzten. Hautatutako ekimena, “Gazte & play”, Koldo Mitxelenako DBHko 3. mailako ikasleek diseinatu zuten eta Hobetuz gazte programaren bidez finantzatu zen partzialki.
